Гүлсара АТАБАЕВА, оқытушы

Мамыр айында өткен «Білім. Жұмыс. Мансап – 2011» мамандырылған көрмесіне облыстағы  оқу орындарымен бірге  Ақтөбе қаласындағы №6 кәсіптік лицейдің «Мамандықтың бәрі жақсы - таңдауың өзіңде» атты үгіт бригадасы концерттік бағдарламасымен қатысты.

40 жылдық  тарихы бар оқу орны  Ақтөбе өңіріне аса қажетті кәсіби жұмысшы мамандарын  даярлауда. «Автомобильді жөндеу слесарі», «Автомобиль краны машинисі», «Аспаз – тәттігер», «Құрғақ құрылыс әдіскер-маманы», «Бір ожаулы экскаватор машинисі», «Тас қалаушы» «Ағаш шебері» салалары бойынша  болашақ жұмысшы мамандары білім алады. Түлектеріміз Қазақстан экономикасын  өркендетуге  өз үлестерін қосуда.  Жас Астананың құрылыс жұмыстарына да белсене қатысты.

«Еңбек етсең ерінбей, тояды қарның тіленбей» деп  ғұлама Абай атамыз айтқандай, лицейде нағыз еңбекқор ұл – қыздарымыз оқиды. Шәкірттеріміз құрылысы қанат жайған Қазақстанда жұмыссыз қалмайтынын, болашақта үлкен жетістіктер күтіп тұрғанын жақсы біледі.

Көрмеде оқушылар мамандықтарын мақтан тұтатынын айта келе өздерінің өнерлерін көрсетті. «Жігітке жеті өнер де  аз» дегендей, темір тұлпардың қыр – сырын танып жатқан  «автослесарь» ұлдарымыз «Адай»  күйін керемет шабытпен  орындады. КВН-ші «автомеханиктер», ақын жанды «аспазшылар», әнші «экскаваторшылар» өнерлерін ортаға салды. «Біз жаспыз, біз белсендіміз, біз жігерліміз» деп ұрандап, жастарды жігерлендіре  түсті. Мұндай игі шаралар жастарды жігерлендіріп қоймай, өз таңдауларын жасауға, болашаққа нық қадам басуға көмектеседі.

Ақтөбе қаласы